شقيقة المتهم بقتل كلب كفر طهرمس: "أخويا مربي كلاب.. إزاي يقتل واحد؟"

كشفت رودينا عبدالعزيز، شقيقة الطالب المتهم بقتل كلب في منطقة كفر طهرمس بالجيزة، تفاصيل الواقعة، مؤكدة أن شقيقها محمد عبدالعزيز ياسين، 19 سنة، طالب في معهد المدينة بشبرامنت، ويعمل في محل فراشة تابع للعائلة لمساعدتهم في المصاريف.

وقالت رودينا: "أخويا كان راجع من الشغل في كفر طهرمس، شارع داير الناحية، وفجأة الكلب طلع عليه وعضه في رجله".

الكلب هاجم سيدة منتقبة

وأضافت: "الكلب ده تضرر منه ناس كتير في المنطقة، وآخر واقعة حصلت لما هجم على سيدة منتقبة، وقعت على الأرض، وظهرت أجزاء من جسدها قدام الناس، وعندي فيديو للحادثة ولسيدة تانية اشتكت منه".

إزاي يقتل كلب وهو بيربيهم؟

واصلت قائلة: "أخويا بيربي كلاب وبيبيعهم، فإزاي يقتل كلب؟ اللي حصل إن الكلب لما هجم عليه، حاول يهشه، فجري الكلب وخبطته عربية معدية، لكن أخويا دلوقتي محبوس في قسم بولاق الدكرور من يوم الحادث".

واختتمت حديثها مؤكدة أن والدها، الذي يعمل مهندسا في شركة الشرقية للدخان، في حالة نفسية سيئة، ووالدتها لم تغادر غرفتها منذ الواقعة حزنا على ابنها.