اعترافات لصوص الكابلات أمام النيابة: كنا بنسرق عشان نبيع ونكسب

أدلي المتهمين بسرقة كابلات كهربائية ضغط عالٍ تخص أحد المشروعات بمنطقة النزهة، باعترافات تفصيلية أمام النيابة العامة حول ارتكابهم الواقعة.

وقال المتهم الأول خلال التحقيقات :"بصراحة يا باشا، إحنا كنا ماشيين من زمان بندور على شغل ومفيش، وكل يوم الحال بيضيق بينا، ومرة واحنا قاعدين على القهوة جت سيرة إن الكابلات دي بتتباع بفلوس كويسة، والخردة شغالة اليومين دول،  فقولت لصاحبي، تعالا نجرب حظنا، يمكن نكسب ونفك زنقتنا، فخططنا نطلع آخر الليل  عشان الدنيا هادية ومفيش حد بيعدي، وخدنا معانا منشارين، مفكات، وسكينة كبيرة، وكل واحد شال معداته وطلعنا على المكان اللي ورا المشروع".

وأوضح المتهم الثاني خلال التحقيقات:" أنا كنت حاسبها من بدري. قولتله إحنا هنجيب المعدات ونشوف المكان، وفعلاً رحنا قبلها بيوم بالليل نشوف الوضع، لقينا مفيش حراسة ولا حد، قولتله بكره نرجع ونفك الكابلات ونمشي، يومها لبسنا هدوم غامقة علشان مانبانش، وفعلاً بدأنا نقطع الكابلات ونلفها، كنا جايبين شكاير نحط فيها الكابلات، إحنا مكنّاش ناويين نأذي حد ولا نبوظ حاجة، إحنا بس عايزين نبيعهم وناخد الفلوس، وكنا متفقين نقسم المبلغ بالنص".

وتابع:"كنا عارفين إن الكابلات دي غالية وهنعرف نصرفها بسهولة، فيه واحد في الحتة عندنا بياخد أي حاجة خردة من غير سؤال، قولنا هنوديها له، وكل واحد فينا ياخد حقه. مكناش متخيلين إن الشرطة هتيجي بالسرعة دي".

واستطرد المتهم قائلاً: “واحنا في نص الشغل سمعنا صوت عربية، قولتله نجري، بس مكنّاش لسه لمّينا الحاجة، المباحث  نزلت علينا فجأة، وكل حاجة كانت في الأرض حوالينا، حاولت أستخبى، بس مسكونا، ولقوا المعدات معانا”.

بدأت القصة لما تلقت الأجهزة الأمنية بلاغات من سكان في منطقة النزهة عن تحركات مشبوهة حوالين موقع مشروع خاص بكابلات الضغط العالي. الأهالي لاحظوا إن في ناس بيجوا آخر الليل وبيتحركوا حوالين المكان بطريقة مريبة.

فور البلاغ، تحركت قوة أمنية سريعة لمكان الواقعة، وتم رصد شخصين بيحاولوا قطع كابلات كهربائية، وبحوزتهم أدوات حادة ومعدات فك وتركيب.

بمواجهتهم، عثرت الشرطة على 7 كابلات كهربائية مقطوعة وجاهزة للنقل، بالإضافة إلى عدد من المفكات والمناشير والأكياس.

تم ضبط المتهمين في حالة تلبس واقتيادهم لقسم الشرطة بالنزهة للتحقيق معهم.

أثناء التحقيق، واجهت الشرطة المتهمين بالمضبوطات والأدوات المستخدمة في السرقة، واعترفا بتفاصيل خطتهم، وأكدوا إنهم كانوا بيخططوا يبيعوا الكابلات لتجار خردة.

كشفت التحريات إن المتهمين عاطلين وسبق الاشتباه فيهم بوقائع سرقة مماثلة، وإنهم يستغلوا فترات الليل وضعف الحراسة لتنفيذ جرائمهم.

تم تحرير محضر بالواقعة، والتحفظ على المضبوطات، وأُحيل المتهمان للنيابة العامة لمباشرة التحقيق، ووجهت إليهم تهمة الشروع في سرقة ممتلكات عامة.