حسام حبيب: شيرين مديونة ليّا بـ 60 مليون جنيه وعندي كل الدلائل

كشف الفنان حسام حبيب عن  أسرار جديدة عن علاقته بالفنانة شيرين عبد الوهاب، قائلا إنها مدينه له بمبلغ حوالي 60 مليون جنيه.

وأضاف حبيب، خلال حواره مع الإعلامية بسمة وهبة في برنامج العرافة المذاع عبر قناتي النهار والمحور،أنه قادر على الإنفاق على نفسه دون الحاجة إلى أي دعم مالي من عائلته، خاصة أنه عمل سنوات طويلة في المجال الفني قبل ارتباطه بشيرين.

شيرين مستلفة مني فلوس

واستكمل:"شيرين بنفسها اعترفت أمام الجميع بأنها تدين له بمبالغ كبيرة، حيث قال: “في مرة شيرين وقفت قدام الناس كلهم وقالت: أنت ليك عندي فلوس وخدها.. رديت عليها وقلت لها عيب.. فكان ردها: ماليش في أبو بلاش!”

وتابع:"مش شغل حد أنا بجيب فلوسي منين.. أنا اشتغلت 8 سنين متواصلة قبل شيرين، والحمد لله دلوقتي بعرف أنام وأكل وأشرب وأصرف على نفسي.. هل الناس شافتني ماشي بلبس مقطوع؟"

وأوضح حبيب أن تصريحاته السابقة بأن والده ينفق عليه، كانت تحت ضغط، لكنه نفى كل ذلك، مؤكدا أنه يعتمد على نفسه في كل شئ.

محدش بيصرف عليا

وأكد أنه لم يكن يهدف إلى استرداد هذه الأموال، بقدر ما كان يريد أن يثبت لها حجم ما قدمه لها ماليًا خلال فترة علاقتهما، خاصة وأنه حرص على مساعدتها في أوقات صعبة دون انتظار مقابل.

وأوضح حسام أنه لجأ إلى المحاسب الخاص به، وطلب منه جمع كافة التفاصيل المالية المتعلقة بتعامله مع شيرين، ليكتشف أن المبلغ الذي تدين له به ضخم للغاية.

واستكمل:"كل دا وأنا مش هاخد منها فلوس، بس كنت عاوز أثبت لها حجم الفلوس اللي سابتها عندي.. المحاسب قالي إن الرقم كبير جدًا، والحقيقة إنها مديونة ليّا بأكتر من 60 مليون جنيه، وعندي كل الأرقام اللي تثبت الكلام ده".

وعن شراكتهما في إحدى الشركات، علق حسام موضحا أنه يمتلك 10% منها، بينما تمتلك شيرين نسبة 80%، إلا أنه لم يحصل على أي أرباح منها، إحنا شركاء في شركة مساهمة، أنا ليّا فيها 10% وهي ليها 80%، بس الأرباح كلها في إيدها ومش بتديني أي حاجة، ولا حتى بتعامل مع الشركة، هي اللي بتحكم فيها لوحدها".

وعلى الجانب الأخر، أكد حسام أنه لا يسعى لاسترجاعها، لأنه مؤمن بقدراته وبأنه قادر على تحقيق نجاح مالي بنفسه إذا ركز على عمله، حيث قال: "مش عاوز منها حاجة.. أنا لو ركزت في شغلي هاجيب فلوس أكتر منها بكتير.. شوفوا حفلات شيرين كانت بكام، ودلوقتي بقت بكام".