زيزو: "لم أوقع لأي نادي واللي عنده توقيعي ينشره"
كشف أحمد سيد "زيزو"، صانع ألعاب الزمالك، أسرارًا عن مستقبله مع ناديه، في ظل اقتراب نهاية عقده.
وقال زيزو، في منشور على صفحته الشخصية اليوم الثلاثاء على "فيس بوك": "الحمد لله.. أنا راجل بحترم كل الناس، لكن للأسف، عدم ردي على المعلومات المغلوطة والتزامي بالصمت، خلا كل شوية يطلع خبر عن توقيع أو تجديد عقدي، وكل واحد بيغازل الشريحة اللي عايزها من الجمهور، بسبب خبر رايح وخبر جاي؛ بكل وضوح: أنا لم أوقع لأي نادٍ سواء داخل أو خارج مصر".
وتابع: "اللي بيقول إنه حصل على توقيعي، يتفضل يعلن لو كلامه صحيح، وكمان اللي عنده دليل على توقيعي لأي نادي، برضو يتفضل يطلعه على الملأ؛ الناس لازم تعرف كويس إني بقدّر جدًا الكيان الكبير اللي بلعب فيه، ومش ممكن أنكر فضله عليّا؛ لكن في حاجة مكنتش حابب أتكلم فيها خالص، لأنه للأسف الإعلام بيتكلم في اتجاه واحد بس.
ليه محدش اتكلم عن حقوقي المشروعة زيي زي أي لاعب في الدنيا؟"
وأضاف متسائلًا: "ليه محدش اتكلم إن الناس سابوني بقالها شهور طويلة ومش عايزين يجددوا عقدي؟ ليه محدش اتكلم عن المستحقات المتأخرة اللي ليا من زمان، ومفيش حد بيرد؟، ليه محدش اتكلم إن التجديد المرة دي جاي في مرحلة متقدمة من عمري بالنسبة للعيبة الكورة؟ والكل عارف إن عمر اللاعب قصير في الملاعب، أكيد كل واحد فيكم عنده أسرة وعليه التزامات، ومحدش كمان اتكلم إن ربنا سبحانه وتعالى أنعم عليا بعروض مقابلها المالي ٥ أضعاف العرض اللي موجود حاليًا، ورغم كده، قلت وهفضل أقول: أنا منتظر كلمة النادي، وده لأسباب كتير، مش لتجميل الصورة".
ووجه زيزو حديثه للجمهور قائلًا: "لازم تكونوا عارفين الحقيقة، زيزو مش بيزايد، ولا بيتاجر، لكن لازم الطرف التاني يكون عايزني أكمل، وتكون فيه استجابة حتى لربع المعروض عليّ على الأقل، لكن للأسف، الكلام معايا حاجة، واللي بيتقال للإعلام حاجة تانية.
أنا مينفعش أجرح في حد، ولا أتكلم على حد، لأن اللي بيتقال في الجلسات مينفعش يتقال بره، وده على الأقل من ناحيتي".
واختتم قائلاً: “أنا مستني رد النادي لحد آخر يوم في الكونفدرالية، وأتمنى ربنا يكرمنا بيها أنا وزمايلي، وأي كلام هيتقال غير كده بخصوص التجديد أو التوقيع، هيكون غير صحيح، ورسالتي الودية جدًا للمسئولين في النادي اللي أنا بحترمهم كلهم: أتمنى إن الحوار في مسألة تجديد العقد يكون بيني وبينكم، مش عن طريق الإعلام؛ وأنا كنت ولا زلت واضح معاكم في كل اللي اتكلمت فيه من أمور عادلة تساعدنا نكمل المشوار؛ شكرًا لتفهمكم موقفي”.
